Навіны раёна

13 мая 2022

На Чашніччыне прайшла ваенна-патрыятычная гульня «Арляня»

Напярэдадні Дня Перамогі ў Парку Неўміручасці райцэнтра адбыўся раённы этап рэспубліканскай ваенна-патрыятычнай гульні «Арляня». Удзел у ім узялі шэсць каманд устаноў адукацыі Чашніччыны. Гэтае мерапрыемства ў нашым раёне прайшло ўпершыню.Арганізатарамі выступілі Чашніцкі раённы ваенны камісарыят, Чашніцкая раённая спецыялізаваная дзіцяча-юнацкая спартыўная школа алімпійскага рэзерву, РАС ДТСААФ, аддзел па адукацыі Чашніцкага райвыканкама, раённы цэнтр дзяцей і моладзі.
Камандныя спаборніцтвы па выкананні абаронна-спартыўных і інтэлектуальных дысцыплін пачаліся з конкурсу-вітання: юнакі і дзяўчаты здзіўлялі прамоўніцкім і вакальным майстэрствам, расказвалі пра свае ўстановы адукацыі і пра тое, якая ў іх вядзецца работа па патрыятычным выхаванні. Потым хлопцы прайшлі ўрачыстым маршам і выканалі атрадную песню, прадэманстравалі навыкі страявой падрыхтоўкі, здалі рапарт.

Таксама каманды пераадолелі ваенізаваную эстафету: разбіралі і збіралі на хуткасць аўтамат Калашнікава (некаторыя спраўляліся за 60 секунд), укладвалі рэчмяшок, рыхтавалі і разраджалі краму зброі, кідалі навучальныя гранаты, аказвалі даўрачэбную дапамогу пацярпеламу. А яшчэ выконвалі пачатковае практыкаванне з пнеўматычнай вінтоўкі, седзячы з локця і стралялі па мішэні з адлегласці 10 метраў.Хлопцы змагаліся за перамогу ў падцягванні на перакладзіне, а прадстаўніцы прыгожай паловы — у выкананні практыкаванняў па пад'ёме тулава са становішча лежачы на спіне.
Школьнікі перацягвалі канат і беглі індывідуальны крос. у рамках інтэлектуальнага турніру паказалі нядрэнныя веды ваеннай гісторыі Беларусі і Узброеных Сіл нашай краіны.

Удзельнікі прадставілі на суд журы "баявыя лісткі": мастацка аформленыя плакаты з назвай каманды, кароткай інфармацыяй аб ёй і артыкуламі на прапанаваныя тэмы.Другое месца заняла каманда "Успышка" СШ №1 райцэнтра, трэцяе - каманда "Патрыёты" Цяпінскі дзіцячы сад - сярэдняй школы.

У асабістым заліку ў падцягванні на перакладзіне лепшым быў Даніла Закрэўскі (СШ № 4 г. Чашнікі). У выкананні практыкаванняў па падніманні тулава са становішча лежачы на спіне - Паліна Цюхай (СШ №2 г. Новалукомль).На дыстанцыях індывідуальнага кросу лідзіравалі Ангеліна Варгаліёнак (Цяпінскі дзіцячы сад — сярэдняя школа) і Іван Закрэўскі (СШ №1 г. Чашнікі).

Павіншаваў пераможцаў і прызёраў, уручыў ім дыпломы, салодкія прызы ваенны камісар Чашніцкага раёна Ігар Палубінскі. Ён падзякаваў усім ігракам за ўдзел, адзначыў іх дастойную падрыхтоўку. А камандзе-пераможцу пажадаў удачы на маючых адбыцца спаборніцтвах.

Варвара ЮРКЕВІЧ "Чырвоны прамень".

Усе навіны