Навіны рэгіёну

Сустрэча гасцей у Мінскай вобласці 28 верасня завяршылася знаёмства прадстаўнікоў дыпкорпуса з рэгіёнамі нашай краіны. У ходзе візіту госці наведалі і Слуцк.

Мерапрыемствы пачаліся з ускладання кветак да брацкіх магіл і Вечнага агню ў памяць аб ахвярах Вялікай Айчыннай вайны.

- Даніна памяці загінулым - вельмі кранальны і важны момант. Свет і вайна - гэта тэмы, якія закранаюць кожную краіну. І вельмі важна ў цяперашняй сітуацыі падтрыманне міру для выбудоўвання канструктыўных узаемадзеянняў паміж краінамі, - падзяліўся ўражаннямі Ахмед Салем Салех Аль-Вахейши, Надзвычайны паўнамоцны пасол Йеменскай Рэспублікі ў Расійскай Федэрацыі і па сумяшчальніцтве ў Рэспубліцы Беларусь.

На сыраробным камбінаце для гасцей падрыхтавалі прэзентацыю прадукцыі прадпрыемстваў Слуцкага раёна. Прысутныя змаглі ацаніць якасць слуцкага сыру, каўбасных вырабаў, малочнай прадукцыі, хлеба і напояў.

Прадстаўнікі дыпламатычнага корпуса таксама правялі сустрэчу з кіраўніцтвам Мінскай вобласці, Слуцкага раёна і мясцовых прадпрыемстваў. Удзел у мерапрыемстве прынялі старшыня Беларускай гандлёва-прамысловай палаты Уладзімір Улаховіч, намеснік старшыні Мінскага абласнога выканаўчага камітэта Дзяніс Курленкa, намеснікі старшыні Слуцкага раённага выканаўчага камітэта Жанна Руцкая і Наталля Чарнушэвіч.

Дзяніс Курленкa распавёў гасцям аб эканамічным патэнцыяле Мінскай вобласці і інвестыцыйных магчымасцях рэгіёну. Таксама ён падкрэсліў, што Міншчына зацікаўлена не толькі ў развіцці гандлёвых адносін, але і сувязяў у сферах культуры, адукацыі, аховы здароўя, навукі, будаўніцтва, турызму і г.д.

- Гандлёвае супрацоўніцтва паміж нашымі краінамі актыўна развіваецца. Самы галоўны кампанент, які мы купляем у Беларусі, - гэта калій. Нядаўна пачалі набываць грузавікі БелАЗ. Але колькасць імпарту павялічваецца. Падпісалі і пагадненне паміж нашымі краінамі аб куплі трактароў МТЗ. Паміж Індыяй і Беларуссю актыўна вядзецца супрацоўніцтва ў сферы фармакалогіі, - распавёў аб развіцці беларуска-індыйскіх гандлёвых адносін Джейсундар, першы сакратар пасольства Індыі ў Беларусі.