Навіны рэгіёну

Усё, што трэба ведаць пра стаўкі падатку на аўто. Адказваем на пяць асноўных пытанняў

У гэтым годзе беларусы выплачваюць транспартны падатак поўнасцю - за ўвесь 2022-і. На пяць асноўных пытанняў аб ім нам адказаў начальнік галоўнага ўпраўлення падаткаабкладання фізічных асоб Міністэрства па падатках і зборах Андрэй Кавалеўскі.

1. Як вылічваюць суму падатку?

У падатковым кодэксе транспартныя сродкі падзелены па катэгорыях: легкавыя, грузавыя, аўтобусы, матацыклы і гэтак далей. Стаўкі прымяняюцца ў залежнасці ад дазволенай максімальнай масы тэхнікі або колькасці пасадачных месцаў для аўтобусаў. Напрыклад, асноўная стаўка транспартнага падатку для легкавых аўтамабіляў масай больш як 1,75 т да 2 т складае 102 рублі за год. Адзначу, што падатак залежыць і ад часу фактычнай рэгістрацыі. Калі ваша машына стаяла на ўліку ў органах ДАІ тры месяцы, то падатак разлічваецца толькі за іх.

2. У каго ёсць ільготы?

Стаўка падатку зніжаецца на 50 працэнтаў, калі транспартны сродак зарэгістраваны ў органах ДАІ на пенсіянера па ўзросце, інваліда 1-2-й групы, аднаго з бацькоў у шматдзетнай сям'і, ветэрана баявых дзеянняў. Праўда, ёсць адна важная ўмова: у такой асобы павінна быць дзеючае вадзіцельскае пасведчанне адпаведнай катэгорыі. Для інвалідаў 3-й групы стаўка падатку паніжаецца на 25 працэнтаў пры той жа ўмове.

Ад транспартнага падатку вызваляюцца электрамабілі, якія прыводзяцца ў рух выключна электрычным рухавіком, а таксама аўто, выпушчаныя да 1992 года або спецыяльна абсталяваныя для інвалідаў.

3. Што рабіць, калі паведамленне не прыйшло?

Трэба зарэгістраваць асабісты кабінет на партале падатковых органаў. Там можна ў любы момант нанава сфарміраваць паведамленне і азнаёміцца з ім. Там жа пазначаны QR-код для хуткай аплаты, а таксама УНП плацельшчыка для тых, каму зручней выкарыстоўваць АРІП. Акрамя таго, заўсёды можна звярнуцца ў падатковы орган і атрымаць копію паведамлення.

Таксама на сайце падатковых органаў ёсць электронны сэрвіс, які дае магчымасць удакладніць інфармацыю аб сваім уліковым нумары (УНП) і па ім правесці плацеж.

4. Дзе можна аплачваць падатак?

Асноўны спосаб - праз АРІП. Гэта могуць быць інфакіёскі, мабільныя дадаткі або інтэрнэт-версіі банкаўскіх дадаткаў. Для аплаты ў меню неабходна выбраць "падаткі - горад (вобласць) - сваю ІМПЗ - транспартны падатак", увесці ўліковы нумар плацельшчыка з ужо атрыманага паведамлення.

Аплаціць падатак можна ў аддзяленнях банкаў або на пошце.

5. Што будзе, калі не заплаціць пошліну?

Гэта стане падставай для прымянення мер прымусовага выканання і выплаты пені, а таксама для прымянення да плацельшчыка мер адказнасці ў парадку і на ўмовах, устаноўленых заканадаўчымі актамі Рэспублікі Беларусь.

Стаўкі транспартнага падатку для аўто з дазволенай масай:

не больш як 1,5 т (а таксама за легкавы аўтамабіль, аб максімальнай масе якога няма інфармацыі ) - 61 руб.

больш як 1,5 т, але не больш як 1,75 т - 81 руб.

больш як 1,75 т, але не больш як 2 т -102 руб.

больш як 2 т, але не больш як 2,25 т - 122 руб.

больш як 2,25 т, але не больш як 2,5 т - 142 руб.

больш як 2,5 т, але не больш як 3 т -162 руб.

больш як 3 т - 223 руб.

прычэп з максімальнай дазволенай масай:

не больш як 0,75 т - 41 руб.

больш як 0,75 т - 223 руб.

прычэп-дача (караван) - 41 руб.

грузапасажырскі і грузавы аўтамабіль,

цягач з максімальнай дазволенай масай:

не больш як 2,5 т - 162 руб.

больш як 2,5 т, але не больш як 3,5 т - 345 руб.

больш як 3,5 т, але не больш як 12 т - 447 руб.

больш як 12 т - 508 руб.

аўтобус з колькасцю пасадачных месцаў:

да 20 уключна - 244 руб.

ад 21 да 40 уключна - 345 руб.

звыш 40 - 447 руб.

матацыкл - 41 руб.

седлавы цягач - 406 руб.

транспартны сродак, аб тыпе якога няма звестак - 41 руб.

Транспартны падатак аплачваецца кожны год да 15 лістапада пасля атрымання паведамлення.