Гісторыя горада Чашнікі налічвае больш за пяць
стагоддзяў. Упершыню яны згадваюцца ў 1504 годзе ў спісе найбуйнейшых
паселішчаў Полацкага Ваяводства Вялікага Княства Літоўскага. Чашнікі належалі
князям Лукомскім, Кішкам, Сапегам, Патоцкім, Валадковічам.
Статус горада быў
прысвоены ў 1966 годзе.
Існуе некалькі тлумачэнняў паходжання назвы Чашнікі. Адно з іх такое. Чашнікі стаяць у нізкім месцы (у Чашніцкай нізіне), нібы ў чашы. Адносна люстэрка Лукомскага возера горад Чашнікі ляжыць на 35 м ніжэй.
Ёсць другое тлумачэнне. Звязваюць назву горада з развіццём у ім у далёкія часы ганчарнай справы. Ганчары выраблялі збаны, гарлачы, міскі, чашкі — што, напэўна, і дало найменне пасяленню.
Маецца яшчэ адно тлумачэнне паходжання назвы Чашнікі — ад слова «чашнік» — прадстаўнік княжацкай адміністрацыі, які наглядаў за пчалярствам і мёдаварэннем для патрэб княжацкага палаца. Ад месца жыхарства гэтага чашніка і пайшла, мабыць, назва пасялення.